Un i'r anoraciaid
Dyma gwestiwn bach diddorol. Ym mha etholaeth yn y Deyrnas Unedig mae nifer yr etholwyr wedi cynyddu fwyaf yn ystod y flwyddyn ddiwethaf? Pe na bawn i'n gwybod yr ateb byswn yn mentro swllt ar ryw le fel De Caerdydd a Phenarth neu etholaeth debyg yn un o ddinasoedd Lloegr lle mae fflatiau wedi bod yn codi fel madarch yn ystod y blynyddoedd diwethaf.
Ond nage wir. Yn ôl y Swyddfa Ystadegau Cenedlaethol o'r chwe chant a rhagor o etholaethau yr un sydd a'r cynnydd mwyaf yw Cwm Cynon. Yn ôl y swyddfa mae'r nifer ar y gofrestr wedi cynyddu 5,523 neu ddeuddeg y cant. Gorllewin Belfast sydd nesaf ar y rhestr gyda chynnydd o ddeg y cant ond gan fod trigolion mynwentydd yr etholaeth honno â record dda am bleidleisio dw i ddim yn meddwl bod hi'n cyfri.
Beth sy'n gyfrifol am y cynnydd rhyfeddol yng Nghwm Cynon? Oes 'na ryw fflatiau moethus yn sydyn wedi ymddangos yn Abercwmboi? A welwyd stad enfawr o dai yn codi dros nos yng Nghwmbach? Go brin. Yr esboniad, dybiwn i, yw bod rhywun wedi bod yn recriwtio pleidleiswyr. Digwyddodd yr un peth yn y Rhondda rhai blynyddoedd yn ol gan ail-sefydlu'r ddau gwm fel cadarnleoedd Llafur. Os ydy Llafur yn gwneud yr un peth yng Ngwm Cynon mae gan Blaid Cymru le i fecso.
Cyn i unrhyw un fy nghamddeall mae unrhyw ymdrech gan unrhyw blaid i berswadio pobol i gofrestru a phleidleisio yn beth da ond does dim dwywaith bod pleidlais uchel yn Rhondda Cynon Taf wastad yn ffafrio Llafur.
Mae 'na fran i bob deryn du ac mae'n ymddangos bod y sefyllfa yn gwbwl gwahanol yng Nghaerffili- y fwrdeistref drws nesaf. Yr etholaeth lle mae'r nifer o bleidleiswyr wedi gostwng fwyaf yn y flwyddyn ddiwethaf yw Islwyn (-10.4%) a chanlyniadau wardiau'r etholaeth honno sydd yn draddodiadol yn penderfynu p’un ai Llafur ai Plaid Cymru sy'n rheoli yn Ystrad Fawr.
Golygydd Materion Cymreig y ÃÛÑ¿´«Ã½ yn blogio'n rheolaidd ar faterion gwleidyddol Cymru.
SylwadauAnfon sylw
Anghwir yw eich dehongliad. Chi wedi anghofio bod ffiniau Cwm Cynon wedi newid - ychwanegwyd 2 ward i'r etholaeth ers yr etholiad diwethaf. Felly dyw'r ffigurau ddim yn golygu ddim byd.
Dyna oeddwn i'n meddwl i ddechrau ond digwyddodd y newid ffiniau ym Mis Gorffenaf 2006. Digwyddodd y cynydd rhwng Rhagfyr 2006 a Rhagfyr 2007.
Wedi edrych ar hwn mewn bach fwy o fanylder - ac wedi siarad gyda'r ONS. Newid ffiniau sy'n gyfrifol am hyn a dim oll arall! Arafwch RCT yn adrodd ffigyrau sy'n gyfrifol am y cynnydd ymddangosiadol, ond mae'n debyg nad yw ONS yn gwirio yn ofalus y ffigyrau chwaith.