ÃÛÑ¿´«Ã½

Roeddwn i yn cymryd rhan yn y gerddorfa ar y fiola. Chwaraesom "The New World Symphony" gan Dvorjak - cerddoriaeth heriol iawn i'w chwarae'n dda mae'n rhaid cyfaddef! Ond ar ôl penwythnos hir o ymarfer caled yn Llangrannog a chymorth gan nifer o staff peripatetig y Sir a myfyrwyr, 'roedd y darn yn llwyddiant ysgubol. Parodd y symffoni 50 munud - a oedd yn cynnwys pedwar symudiad gwrthgyferbyniol.

Bu'r côrau hefyd fel lladd nadroedd yn ymarfer. Bu'r plant a oedd yn y côr cymysg yn ymarfer am oriau dros gyfnod o ddau ddiwrnod; tra bu'r côr bechgyn ychydig yn fwy ffodus yn ymarfer am ddiwrnod yn unig!! Ond er gwaethaf y gwahaniaeth yn yr amseroedd ymarfer - yr un oedd y safon drwy'r gyngerdd i gyd, a hynny bron â chyffwrdd â'r nenfwd!

Wedi i'r ymarferion fod, 'roedd hi'n bryd arddangos y gwaith. Felly, ar ddydd Mawrth, Rhagfyr 18, 2006 cynhaliwyd cyngerdd 'matinee' yn y prynhawn yng Nghanolfan y Celfyddydau ar gyfer plant ysgolion cynradd ac uwchradd y Sir. Yna, estynnwyd croeso i'r cyhoedd yn y nos - o ffrindiau a theulu, i'r ci a'r gath!

Teilwng ydyw dweud fod pawb a wrandawodd ar y wledd o gyngerdd wedi mwynhau eu hunain i'r eithaf ac wedi cael modd i fyw wrth wrando ar y campweithiau canu ac offerynnol.

Teilwng ydyw dweud hefyd fod yr holl blant a gymerodd rhan yn y gyngerdd wedi mwynhau creu y perfformiadau ac wedi mwynhau bod ar lwyfan.

'Roedd cyngerdd côrau a cherddorfa'r Sir eleni - fel pob blwyddyn arall a fu ac fel pob blwyddyn arall a ddaw dwi'n siŵr, yn llwyddiant ysgubol ac adlewyrchodd y ffaith bod llawer iawn, iawn o dalentau prin yng Ngheredigion.

Gan: Carys Mair Davies

Cyhoeddwyd yr erthygl hon fel rhan o gynllun cyfrannu ar y cyd rhwng ÃÛÑ¿´«Ã½ Cymru'r Byd ac Antur Teifi. Daeth y cynllun hwn i ben ar 31 Ionawr 2008.