ÃÛÑ¿´«Ã½

Ac wedi ennill medal efydd yn Kuala Lumpur ym 1998 ac ym Manceinion yn 2002, mae Evans, 29, yn sicr o gasglu un ai medal aur neu fedal arian ym Melbourne.

"Rwyf wedi gwireddu breuddwyd, "meddai'r gŵr o Gaerfyrddin wrth Adran Chwaraeon ÃÛÑ¿´«Ã½.

"Mae'n anodd credu'r peth, roeddwn yn meddwl, wedi casglu dwy fedal efydd nad oedd yn bosib i mi gyrraedd y rownd derfynol yn y Gymanwlad."

Ac er ei fod ymhell ar y blaen trwy gydol yr ornest, roedd eiliadau nerfus iawn i'r Cymro wedi'r dyfarnwr ofyn i'r meddyg archwilio briw o dan ei lygaid.

Ac wedi colli allan ar gyrraedd y rownd derfynol ym Manceinion oherwydd trwyn gwaed, roedd Evans, 29, yn ofni'r gwaethaf.

"Teimlais ei fawd yn fy llygaid ac am tua 15 eiliad roedd yn anodd gweld trwyddo.

"A phan welais y dyfarnwr yn edrych ar y briw roeddwn i'n meddwl 'dyma ni eto'.

"Ond rwyf drwodd ac mae'n anodd gen i gredu'r peth."

Bydd Evans, 29, yn herio David Price o Loegr yn y rownd derfynol ddydd Sadwrn wedi'r Sais drechu Varghese Johnson o India mewn gornest hynod gyffrous.

Yn anffodus i dîm Cymru, colli oedd hanes y tri bocsiwr arall o Gymru yn eu rowndiau cynderfynol ddydd Iau.

Yn y Pwysau Ply (48kg) collodd Mohammed Nasir yn erbyn Darran Langley o Loegr, 19-13.

Bu'n ddiwrnod llwyddiannus i'r Saeson yn erbyn y Cymry gyda James Rusan yn trechu Jamie Crees yn Pwysau Ply (64kg) i gyrraedd y rownd derfynol.

Gorfod bodloni ar fedal efydd fydd Darren Edwards, gollodd yn erbyn Stephen Smith o Loegr.

Ym Manceinion bedair blynedd yn ôl, enillodd Jamie Arthur fedal aur gyntaf Cymru yn y sgwâr focsio ers Howard Winstone yng Ngemau Caerdydd ym 1958.

Enillodd bocswyr Cymru chwe medal y flwyddyn honno ac yng Nghaeredin ym 1986 sicrhawyd pum medal.