|
|
|
|
|
|
|
MAWRTH 18fed Tachwedd 2014 Hygyrchedd Geiriau Yn Unig |
|
 Y
ddrama fer yn fyr o weledigaeth newydd Adolygiad Catrin Jones Brynhawn Mawrth perfformiwyd y ddrama fuddugol yn y gystadleuaeth cyfansoddi drama fer yn Theatr y Maes. Enillydd y gystadleuaeth oedd Dylan Wyn Williams a pherfformiwyd ei ddrama fuddugol, Gwir Baradwys,s gan rai o ddisgyblion Ysgol y Creuddyn, Llandudno. Bachgen ysgol yn marw Drama oedd hi am fachgen ysgol yn marw wedi iddo gymryd ecstasi mewn clwb nos ar ôl gorffen ei arholiadau Lefel A. Roedd strwythur cadarn i’r ddrama. Dechreuwyd gyda golygfa o fedd y bachgen a’i chwaer yn cyfarch y bedd. Aethpwyd â ni at y bedd droeon yn ystod y ddrama a hynny yn ein hatgoffa o fyrdwn y ddrama a’r drasiedi. Aed a ni yn ôl hefyd i’r gorffennol a chyfarfod cymeriadau eraill y ddrama. Gwelsom y prif gymeriadau yn yr ysgol cyn eu harholiad Lefel A. Yr oedd golygfa mewn tafarn yn y dre ac un mewn clwb nos. Awyrgylch tafarn a chlwb Crewyd awyrgylch tafarn a chlwb nos yn dda ond teimlwn fod y gerddoriaeth yn boddi’r llefaru yn yr olygfa clwb. Crewyd undod dramatig trwy orffen gyda’r bedd unwaith eto. Gweithiodd y syniad o ddechrau yn y diwedd gydag ôl-fflachiadau wedyn o’r hyn a ddigwyddodd. Hefyd, roeddwn yn hoffi’r ffordd y portreadwyd y bedd gyda’r golau i gyd wedi’i daflu ar un man ar flaen y llwyfan, a blodau ar y llawr. Yn ogystal, roedd y diweddglo’n effeithiol. Roeddwn yn hoff iawn o’r dull a ddefnyddiwyd i egluro beth oedd wedi digwydd i gymeriadau’r ddrama wedi’r drasiedi. Bu’r dramodydd yn llwyddiannus hefyd wrth greu cymeriadu credadwy ac amrywiol. Roedd y ddeialog yn naturiol gyda tipyn o hiwmor. Perfformiad yn plesio Plesiodd perfformiad disgyblion Ysgol y Creuddyn gyda’u llefaru’n glir. Yr oedd eu defnydd o’r llwyfan yn ddoeth. Credaf fod defnydd o gerddoriaeth yn y ddrama’n hynod effeithiol. Dechreuodd gyda cân leddf Catatonia, Difrycheulyd, wrth inni weld golygfa’r bedd. Roedd y gân yn dychwelyd bob tro yr aethpwyd a ni at y bedd. Rhwng y golygfeydd eraill defnyddiwyd caneuon bywiog gan y Super Furry Animals a Maharishi ac yn sicr roedd hyn yn cyfrannu tipyn at y perfformiad gan greu awyrgylch a rhoi awgrym i ni o’r hyn oedd yn mynd i ddigwydd nesaf. Diffyg gwreiddioldeb Ond er cymaint y rhinweddau ni theimlwn fod yn y ddrama fawr ddim gwreiddioldeb. Mae cyffuriau yn thema a welir dro ar ôl tro mewn llenyddiaeth a drama ac er mwyn cyflwyno thema gyfarwydd fel hyn credaf fod angen cyflwyno rhyw agwedd newydd ar y pwnc. Mae’n wir fod cyflwyno’r bedd ar ddechrau’r ddrama, a’i ddefnyddio wedyn fel atgof poenus o drasiedi drwy’r ddrama yn elfen o wreiddioldeb ond nid yw’n ddigon i gyffroi cynulleidfa nac yn rhoi unrhyw neges newydd. Yn anffodus roedd modd rhagweld beth oedd yn mynd i ddigwydd. Er hyn dyma ddramodydd addawol. Roedd y ddrama wedi’i saerni’n grefftus ac roedd y ddeialog yn rhwydd. Llwyddodd i greu cymeriadau credadwy ac roedd ei neges yn eglur. Trueni na fyddai’r stori ei hun wedi bod yn fwy gwreiddiol.
| |
 © MMI |
|
|
About the ÃÛÑ¿´«Ã½ | Help | Terms of Use | Privacy & Cookies Policy |
