ÃÛÑ¿´«Ã½

Ers diwedd mis Mai, mae wedi bod ar daith fawreddog drwy Gymru a fydd yn para 10 wythnos - ac mi fydd yn anfon ambell sylw at Lleol yn ystod y daith.

18 Mehefin 2004 - Dechrau'r daith
Ar ôl agor Eisteddfod yr Urdd ym Môn mewn cyngerdd gyda Gwyn Hughes Jones, fe gafodd Elin laryngitis yn ystod wythnos gyntaf ei thaith gan orfod canslo un perfformiad ar faes yr eisteddfod ym Mona! Ond wedi gorffwys, mae'r llais yn ôl, ac bydd Elin a'r band wedi perfformio mewn 40 o lefydd cyn gorffen y daith ganol Awst!

"Bydd wedi ymweld ag ardaloedd sydd prin yn cael y cyfle i glywed perfformiadau byw yn y Gymraeg," meddai Ellen Davies, sy'n cyd-lynu'r daith ar ran Recordiau Sain.

"O Dafarn Beca yn Nhrelech a Thafarn y Bont yn Llangernyw i'r British Legion yn Llanrwst a'r Old Wine Vaults yn Nhreffynnon, mae pawb yn sicr o gael eu gwefreiddio.

"Bydd Elin Fflur a'r Band yn cefnogi Emma Bunton a Liberty-X yn ystod Big Buzz Caernarfon ar Orffennaf 25 hefyd," ychwanegodd.

Rhwng yr holl drafaelio mewn fan fawr wen sydd wedi ei haddasu'n arbennig ar gyfer y daith, mae Elin a'r band yn dal i gael amser i gyfansoddi caneuon newydd ac fe fyddan nhw'n dychwelyd i Stiwdio Sain yn Llandwrog fis Hydref i recordio albwm arall a fydd allan erbyn y Nadolig.

Yn cadw cwmni i Elin a'r band ar y daith mae Alun Tan Lan o Bandy Tudur. Mae Alun yn cefnogi'r band gyda set acwstig sy'n cynnwys caneuon gwreiddiol ac addasiadau o ganeuon poblogaidd Y Cyrff a Ffa Coffi Pawb.

Bu Alun yn canu mewn tafarndai ar hyd a lled Iwerddon am saith mlynedd, a chyn hynny roedd yn aelod o'r band Serein.

Mae yntau hefyd wedi cael newyddion da am gytundeb recordio a bydd ei albwm acwstig gyntaf yn cynnwys cyfraniad y ffidlwr dawnus Billy Thomson, sydd wedi perfformio sawl gwaith gyda Meic Stevens ar lwyfannau Cymru.

Cynhyrchir albwm Alun gan Toni Schiavone a Mark Roberts, gynt o Catatonia a'r Cyrff, a bydd yn cael ei ryddhau ar label newydd RASAL yn Eisteddfod Genedlaethol Casnewydd.