ÃÛÑ¿´«Ã½

Dathliad

Ar Ddydd Cenedlaethol Barddoniaeth
dyma fi’n meddwl:
pryd ges innau ’ngeni’n fardd?

Ai wrth ddiflasu’n llwyr ar adrodd ac ailadrodd ryw hen stori
am dedi’n hedfan mewn balŵn
yn nosbarth y babis?
Oeddwn i’n trio dweud fy nweud
bryd hynny
heb gêr y geiriau?

Neu fallai yng ngwersi cyffrous
‘intensive writing’ Mrs Pari-Jones yn David Hughes?
Bardd yr iaith fain fyddwn gynta’ felly.

Ond tybed mai Mr Arwel Jones,
yr athro Cymraeg roedd gas ganddo ‘Welsh’,
a gamodd i swydd y fydwraig
wrth ddatgloi dirgelion y gynghanedd yn Fform Ffôr?
Ynte a arhosais yn y groth ryddieithol, wir,
hyd ddyddiau creadigol chwil
y Gelli Aur,
ac Iwan Llwyd, Wil Garn ac Emyr Lewis
yn frodyr yn y feithrinfa?

Wn i ddim.
Felly waeth i heddiw fod
i minnau’n ddydd fy nathlu
ac yn ddydd pen-blwydd barddoniaeth i ni oll.
Cyfarchion y gerdd i bawb.