ÃÛÑ¿´«Ã½

Bha ceud bliadhna air 4mh den Iuchar 2025 bho rugadh Fionnlagh Dòmhnallach, Finlay J, ann an Sgarasta sna Hearadh, fear de laoich craoladh na Gàidhlig - agus na Beurla - an Alba. A thuilleadh air a bhith na riochdaire air radio is telebhisean, bha e cuideachd na ùghdar, a' sgrìobhadh trì leabhraichean ainmeil - Crowdie and Cream, Crotal and White agus The Corncrake and the Lysander.

Stèidhich e Comann Dràma na Gàidhlig agus, còmhla ri Ruairidh MacThòmais, stèidhich e, agus bha e na fhear-deasachaidh air, an iris Ghàidhlig, Gairm.

Nuair a bhàsaich Finlay J air seachdain a’ Mhòid ann an 1987, chaill saoghal na Gàidhlig fear a bh’ air barrachd a dhèanamh airson na h-ealain Ghàidhlig a chur mu choinneamh dhaoine na là na bha duin’ eile.

San t-sreath sa, tha sinn a’ comharrachadh ceud bliadhna bho rugadh Fionnlagh le taghadh de phrògraman radio a rinn e a' còmhradh ri iomadach duine, thairis air an 30 bliadhna a bha e ag obair aig a’ BhBC.

Rugadh Èairdsidh Grannd ann an 1902 agus bha e a’ seinn bho bha e na bhalachan òg, ach b’ ann eadar an dà chogadh a rinn e ainm dha fhèin an toiseach mar shàr sheinneadair Gàidhlig. Rinn e suas ri deich air fhichead clàr singilte le Beltona agus an uair sin Parlophone. Ach a thuilleadh air a ghibht seinn bha e cuideachd air leth sgileil air fuinn a chur air òrain, dha fhèin ‘s do dhaoin’ eile. Bha Èairdsidh Grannd ann an còmhradh ri Finlay J ann an 1978.