ÃÛÑ¿´«Ã½

Bha ceud bliadhna air 4mh den Iuchar 2025 bho rugadh Fionnlagh Dòmhnallach, Finlay J, ann an Sgarasta sna Hearadh, fear de laoich craoladh na Gàidhlig - agus na Beurla - an Alba. A thuilleadh air a bhith na riochdaire air radio is telebhisean, bha e cuideachd na ùghdar, a' sgrìobhadh trì leabhraichean ainmeil - Crowdie and Cream, Crotal and White agus The Corncrake and the Lysander.

Stèidhich e Comann Dràma na Gàidhlig agus, còmhla ri Ruairidh MacThòmais, stèidhich e, agus bha e na fhear-deasachaidh air, an iris Ghàidhlig, Gairm.

Nuair a bhàsaich Finlay J air seachdain a’ Mhòid ann an 1987, chaill saoghal na Gàidhlig fear a bh’ air barrachd a dhèanamh airson na h-ealain Ghàidhlig a chur mu choinneamh dhaoine na là na bha duin’ eile.

San t-sreath sa, tha sinn a’ comharrachadh ceud bliadhna bho rugadh Fionnlagh le taghadh de phrògraman radio a rinn e a' còmhradh ri iomadach duine, thairis air an 30 bliadhna a bha e ag obair aig a’ BhBC.

‘S iad dithis a bha gu math aithnichte ann an dà shaoghal eadar-dhealaichte a th’ againne a seo 's iad ann an còmhradh ri Finlay J.

Bha Seòras Mòireasdan à Tolastadh bho Thuath, neo ‘Am Breve’, a’ sgrìobhadh colbh do Ghasaet Steòrnabhaigh airson faisg air leth-cheud bliadhna air a robh na 'Brevities', a bha a’ toirt sùil gheur air Leòdhas agus saoghal nan Gàidheal. B’ e maighistir-sgoile an obair-là bh’ aige agus e air ceum a dhèanamh ann a Greugais ‘s Laideann.

Fhuair e facal cuideachd air an t-seinneadair, an einnsinnear ‘s am fear-gnothaich aig a robh a’ chompanaidh Gaelfonn, Murchadh MacFhearghais à Port Bhollair sa Rubha a Leòdhas.

Bha iad le chèile ann an còmhradh ri Finlay J ann a Facal ri Fionnlagh ann an 1984.