ÃÛÑ¿´«Ã½

Pobl yn troi eu cefnau ar werthoedd Cristnogol sy'n gyfrifol am "chwalfa foesol" cymdeithas gyfoes yn ol arweinydd Oedfa'r Eisteddfod yn Yr Wyddgrug heddiw.

A rhybuddiodd y Parchedig Elfed ap Nefydd Roberts mai dim ond trwy droi yn ôl at werthoedd Cristnogol traddodiadol y mae trawsnewid y byd.

Canllawiau moesol

Yn annerch ar y thema,'Ffynhonnau', dywedodd:

"Duw sydd yn rhoi i ni werthoedd ac egwyddorion a dangos i ni sut y dylem ni fyw,

"Mae'r Beibl drwyddo, yn y Deg Gorchymyn, yn y Bregeth ar y Mynydd, ac yn fwy na dim, ym mywyd ac esiampl yr Arglwydd Iesu Grist yn rhoi i ni ganllawiau moesol i'w dilyn a'u hefelychu. A does dim dwywaith mai un o ganlyniadau cefnu ar grefydd, ffydd ac addoli, yw'r chwalfa foesol sy'n tanseilio bywyd cymdeithas heddiw."

Diwylliant 'Fi fy hun'

Ymhlith canlyniadau troi cefn ar ddysgeidiaeth y Beibl cyfeiriodd at"dwf yr athroniaeth unigolyddol sy'n datgan nad oes yna bellach ddim safonau moesol cyffredin, gwrthrychol; mai be sy'n iawn ydi be sy'n iawn i mi; be sy'n dda ydi be sy'n dda i mi, a be sy'n ddrwg ydi be sy'n anghyfleus, neu'n annerbyniol i mi," meddai.

Da a drwg

"Ac y mae hyn wedi esgor ar genhedlaeth sydd ddim yn gwybod y gwahaniaeth rhwng da a drwg; sydd ddim yn gweld dim o'i le ar ladrata a lladd a thwyllo; sy'n credu bod purdeb yn chwerthinllyd o hen ffasiwn a dweud celwydd yn gwbl normal," meddai.

Dim ond Iesu

Ychwanegodd mai dim ond dysgeidiaeth foesol Iesu sy'n cynnig ffordd o afael y trais, y gormes a'r rhyfela sy'n bygwth dyfodol y byd.

"Iesu sy'n ein dysgu mai'r unig ffordd i oresgyn casineb yw trwy garu; mai'r unig ffordd i oresgyn trais a chreulondeb yw trwy ymarfer addfwynder a chymod; mai'r unig ffordd i oresgyn dirmyg a loes yw trwy faddau.," meddai.

"Mae hon yn ddysgeidiaeth sy'n datgan mai cariad yw Duw yn ei hanfod ac mai trwy ymarfer ei gariad ef yn ein perthynas â'n cyd-ddynion y mae canfod llwybr o gors casineb, trais a rhyfel.

"Yn ffynnon ffydd y mae canfod y gwerthoedd yma a'n gwaith ni yw dal ati i dynnu dŵr ohoni i gawgiau blin heddiw," meddai.

Cliciwch yma i ddarllen yr anerchiad cyflawn.