ÃÛÑ¿´«Ã½

"Mae hyn yn wyrth - y tywydd braf yma yr wythnos yma yng nghanol haf fel hyn."

"Mae hi'n union fel stori dylwyth teg, w'chi." - Sgwrs rhwng dau Eisteddfotwr ar faes Yr Wyddgrug, ddydd Iau diwethaf.

Stori'r Steddfod Fach Binc

Un tro amser maith, maith, yn ôl, tua deunaw mis yn ôl, yr oedd Y Steddfod Fach Binc yn drist a heb unman i fynd.

"Does neb fy eisiau i a does gen i ddim cartref," meddai hi wrth eistedd yn ei dagrau ar ochr y ffordd y tu allan i blasty crand y Faenol lle'r oedd hi wedi bod yn mwynhau ei hun mewn parti mawr.

Ond er yr holl holi a chwilio doedd yna neb eisiau gwahodd Y Steddfod Fach Binc i barti mawr arall.

Ac yna, daeth Merswy, Yr Hen Flaidd Mawr Drwg, dros y clawdd yn wên i gyd a dweud; "Tyrd i fy Ninas i Steddfod Fach Binc ac fe gei di y parti mwyaf a gorau a welais ti erioed achos mae gen i ddigon o arian i dalu am bob math o bethau yn ein Dinas Fawr Ni.

Marchog hawddgar

Ond yna, a'r Eisteddfod Fach Binc ar fin gafael yn llaw Merswy y Blaidd Mawr Drwg efo lot o arian, a mynd gydag ef i'w Ddinas Fawr Ddrwg, pwy ddaeth i fyny'r ffordd o nunlle ar gefn asyn ond Syr Fflint, marchog hawddgar ond tlodaidd a chanddo galon fawr.

A chan chwifio ei gleddyf yn wyneb Merswy y Blaidd Mawr Drwg dyma Sir Fflint yn dweud yn Saesneg, "Er nad ydi o yn lle crand ac er nad oes yma lawer yn siarad Cymraeg plîs tyrd i fy nghartref i er mwyn i Ni drefnu y parti gorau a welais ti erioed iti."

A dyma'r Steddfod Fach Binc yn cychwyn ar y daith hir a throfaog i Cyffiniau, lle'r oedd cartref Sir Fflint.

Gŵr doeth

Ond pan glywodd ffrindiau Sir Fflint fod Y Steddfod Fach Binc yn dod doedden nhw ddim yn gwybod beth i'w wneud gan y byddai angen arian mawr, mawr, i dalu am barti fel hwn.

Felly dyma nhw'n troi at ŵr doeth o'r enw Aled yr Hynafgwr a oedd wedi trefnu parti tebyg o'r blaen yn Cyffiniau flynyddoedd maith yn ôl.

Ac fe geisiodd Aled help marsiandwr craff o'r enw Selwyn y Siswrn a aeth ati yn syth i wneud pob math o bethau i gael arian a'u rhoi nhw i gyd, wedyn, i Hywel y Trefnydd gan ddweud wrtho fo: "Yr ydym ni wedi achub Y Steddfod Fach Binc oddi wrth Merswy y Blaidd Mawr Drwg - nawr rhaid i ti drefnu parti na welwyd ei debyg o'r blaen yn Cyffiniau a Chymru Fach."

Glawio a glawio

Ond, a Hywel bron â chael popeth ynghyd fe ddaeth hi yn storm enbyd nas gwelwyd ei thebyg ers saith, saith, o'r pedwar amser yng ngwlad Y Steddfod Fach Binc ac yr oedd Hywel y Trefnydd yn gorwedd yn ei wely yn ofni beth a ddigwyddai wrth i'r gwynt chwythu ac i'r glaw lawio yn ddibaid am oriau a diwrnodau ac wythnosau nes bod cae'r parti fel pwll hwyaid a mwd yn gorwedd ar fwd a'r Steddfod Fach Binc yn ei dagrau yn wylo eto.

Nid oedd dim i'w wneud ond galw ar Elfed y Dewin Doeth o'r Brifddinas Dlos. Ac meddai Elfed y Dewin Doeth wrth Hywel y Trefnydd Partis a Selwyn y Marsiandwr ac Aled y Gŵr Doeth a holl bobol y wlad; "Dydi tywydd fel hyn yn da i ddim i ni."

'Bydd popeth yn iawn . . .'

A dyma fo'n chwifio ei hudlath ac ysgyrnygu ar y cymylau a bygwth y glaw a thaflu mynyddoedd o gerrig dros y moroedd mwd gan ddweud; "Paid a wylo Steddfod Fach Binc. Bydd popeth yn iawn"

Ac wythnos cyn parti mawr Y Steddfod Fach Binc dyma'r glaw yn peidio, a'r mwd yn sychu wrth i'r haul dywynnu dros erwau Cyffiniau lle cafwyd y parti gorau a gafodd Y Steddfod Fach Binc ers blynyddoedd lawer.

Ac yn awr bod Y Steddfod Fach Binc yn hapus mae Aled yr Hynafgwr wedi gofyn i Huw ap Eic drefnu parti arall iddi hi y flwyddyn nesaf yn Ninas Fawr Caerfryngis lle mae llawer yn siarad Cymraeg. Ac mi fydd Y Steddfod Fach Binc yn byw yn hapus byth eto.