ÃÛÑ¿´«Ã½

Apêl am i arweinwyr ieuenctid greu awyrgylch o gyfrifoldeb ymhlith pobl ifainc oedd un arweinydd cyfeillion yr Eisteddfod o dramor heddiw.

Ac am i Gymry tramor fod yn llysgenhadon dros eu gwlad.

Yn siarad mewn derbyniad yn syth cyn seremoni croesawu y Cymry o dramor yn y pafiliwn dywedodd y Dr Melya Hughes Crameri o'r Swisdir:

"Fy neges heddiw yw i arweinwyr ieuenctid ein gwlad ym myd addysg a gofal greu awyrgylch o awydd a chyfrifoldeb ymhlith yr ieuanc fel y byddant yn llunio dyfodol ar gyfer eu hunain i fod nid yn unig yn ddilynwyr ond yn arweinwyr yn y byd er lles trigolion ac er anrhydedd i genedl y Cymy."

Mae Dr Crameri yn wyddonydd ymchwil meddygol ac wedi teithio'r byd yn eang o'i chartref yn y Swistir ac ar hyn o bryd yn sefydlu cwmni ymchwil newydd sbon yng Nghaliffornia "er mwyn datblygu manteision gwerthfawr ar gyfer dynoliaeth."

A hithau wedi ymweld â phum cyfandir ers Eisteddfod Abertawe y llynedd dywedodd ei bod yn ddyletswydd ar rai fel hi i hyrwyddo Cymru a Chymreictod a diolchodd i'w rhieni, Eryl ac Edwena Hughes o Abergele, am sicrhau iddi fagwraeth ac addysg Gymraeg yn ystod ei phlentyndod yn Llundain.

"Mae lle i wledydd bychain fel Cymru i wneud eu rhan ac o fewn Cymru mae môr o dalent ac o allu," meddai.

"Fel y teithiaf y byd, caiff pawb wybod mai Cymraes ydwyf a dylai pob un ohonom sy'n Gymry yn byw dramor fod yn llysgenhadon ar ran Cymru er datblygu cysylltiadau a chydweithrediad ar gyfer y dyfodol," meddai.