|
Gan fod Nest yn rhifyn diwethaf y Plu wedi ein hatgoffa o Steddfod 1949 yn Nolgellau dyma rai o'm hatgofion 'Fyddwn i ddim yn dymuno steddfod arall fel hon'. Does gen i fawr a gof am y steddfod ei hunan ond yn sicr nid oedd cwt ieir bach yn ddelfrydol i bump! Nid oeddem yn codi fel ieir o bell ffordd - diogi yn y bore a rhai'n galw heibio i'n gweld a ninnau ein pump yn dal yn solet ar y glwyd. Roedd hi'n mynd yn boeth ddifrifol yn y cwt yn y nos a ninnau ofn cadw'r drws ar agor gan fod cwn yn dod heibio. Atgof Mai Court (Sturkey) oedd iddi golli'r swydd o wneud brecwast gan ei bod yn rhy hir wrthi a ninnau ar glemio! Edrych ymlaen am ddod adre i gael bath oeddwn i ond bu'n rhaid aros i'r pen - pawb ond Nest. Dihangodd honno efo Elwyn! Ni fyddwn yn recomendio wythnos mewn cwt ieir i neb, ond siawns fod merched ifanc yr oes hon yn gallach. Cafwyd barddaniaeth wedi'i sgwennu inni. Dyma'r cyfarchiad a anfonodd W.J. Richards, Derwenlas.
Chwi geiliogod y colegau
Ar ôl dod yn dyrfa lon
I Eisteddfad fawr Dolgellau
Ewch i ffermdy Tanyfron;
Wedi cyrraedd yno'n llawen
Mynnwch gael eich siâr o hwyl
Yn y 'Clwydle' mae pum cywen
Wedi dod i dreulio'r Wyl. Nest, Eleanor a'r ddwy Ella
Sydd â'u clodydd ym mhob man.
A daeth Mai bob cam mi goelia
Yno i nyrsia'r carwyr gwan!
Os am anfon gair yn barod
Cyn yr Wyl i'r cwmni llon
Ar yr amlen rhowch 'Cywennod,
Clwydle, Buarth Tanyfron. A dyma gyfarchiad Siôn Brydydd o Gemaes. Cyflwynedig i deulu Plas yr leir
Lles i gynnes gywennod - yw dilyn
Deialog eisteddfod;
I'w hanian bur, da iawn bad
Colegau di-geiliogod. Yn ôl Ceiriog yr oedd pabell eisteddfod fawr 'ffiffti wyth' yn Llangollen wedi'i thoi yn benigamp â chlamp a wrthban gwlannen. Eithr mwy rhyfeddod lawer a welwyd yn Nolgelllau yn 1949!
 |
Ìý
